საერთაშორისო სათხილამურო ფედერაციის (FIS) ინიციატივით უკვე მეშვიდე წელია ,,თოვლის მსოფლიო დღე“ აღინიშნება.
"მთის კურორტების განვითარების კომპანია" ავრცელებს ინფორმაციას, რომ „თოვლის მსოფლიო დღე“ საკმაოდ მასშტაბური ღონისძიებაა და მასში 45 ქვეყანა იღებს მონაწილეობას. პროექტის მიზანია ახალგაზრდებში ზამთრის სპორტის პოპულარიზაცია და მასში ჩართულობის გაზრდა. ამ დრომდე ღონისძიება 645- ზე მეტ კურორტზე ჩატარდა და კონკურსში მონაწილეობა 600 000-ზე მეტმა ადამიანმა მიიღო. აღსანიშნავია, რომ ,,თოვლის მსოფლიო დღე“ ეროვნულ დღესასწაულად დადგინდა ავსტრიაში, კანადაში, საფრანგეთში, ისლანდიაში, ნორვეგიაში, პოლონეთსა და შვედეთში.
21 იანვარს ეკონომიკისა და მდგრადი განვითარების სამინისტროს „მთის კურორტების განვითარების კომპანიისა“ და საქართველოს სათხილამურო ფედერაციის ორგანიზებით, სპორტისა და ახალგაზრდულ საქმეთა სამინისტროს, კომპანია ,,სილქნეტის“, დეველოპერული კომპანია ,,რედკოს“ და ბაკურიანის მთის კლუბების ასოციაციის მხარდაჭერით, საქართველოს ოთხივე სამთო კურორტზე: გუდაურში, ბაკურიანში, მესტიასა და გოდერძიზე „თოვლის მსოფლიო დღე“ აღინიშნება. გაიმართება ბავშვთა გასართობი ღონისძიებები, ჩატარდება სახალისო შეჯიბრებები, რომელშიც ყველა მსურველს აქვს მონაწილეობის მიღების საშუალება. გუდაურში, „თოვლის მსოფლიო დღეს“ შეუერთდება კულინარიული სკოლა „კარამელი“, „ბასტი ბუბუს“ მომღერალი ბავშვები და ანიმატორთა ჯგუფი „მხიარული ავტობუსი“.
აქტივობები დაიწყება 12:00 საათზე გონდოლის ქვედა სადგურის მიმდებარე ტერიტორიაზე. დაბა ბაკურიანში კი 17:00 საათზე, ბავშვებს პარკი „ჯოილენდი“ უმასპინძლებს. ღონისძიება ბაკურიანის მთის კლუბების ასოციაციის ორგანიზებით ჩატარდება.
