როგორ დავძლიოთ ურბანული კოლაფსი ? | Property Georgia

როგორ დავძლიოთ ურბანული კოლაფსი ?

უძრავი ქონების #1 გზამკვლევი პორტალის დამფუძნებლის და მმართველი პარტნიორის ლიკა ქარდავას ბლოგი

დღევანდელი თბილისის არქიტექტურულ-ურბანული იერსახის დახასიათებისას ხშირად გვესმის შეფასებები: “უსახური შენობები” , “დუბაიზაცია” , “ბეტონის ქალაქი”, “ერთმანეთან შეუსაბამო შენობები”, “არქიტექტურული მემკვიდრეობის გაქრობა”, “ქაოტური მშენებლობები”, “მწვანე სკვერების ნაკლებობა” ...

და მაინც, რა მიმართულებით უნდა განვითარდეს დედაქალაქი? როგორ უნდა იქნეს აღდგენილი მისი არქიტექტურული ესთეტიკა?...

საინტერესოა მსოფლიოს სხვადასხვა განვითარებული ქვეყნების და ქალაქების გამოცდილება ამ მიმართულებით.

მიუხედავად იმისა, რომ სინგაპურს განსხვავებული გეოპოლიტიკური, ეკონომიკური და ისტორიული მოცემულობა აქვს, ვფიქრობ მაინც რელევანტურია მისი წარმატებული ურბანული განვითარების მოდელის გაზიარება.

სინგაპურს 50 წელი დაჭირდა იმისთვის, რომ დღეს, გლობალური 2017 Smart Cities Index -ის რეიტინგში მეორე ადგილი დაეკავებინა ურბანული დაგეგმარების, მდგრადი განვითარების და განახლებადი ენერგიის წყაროების ათვისების, ბიზნესის ეკოსისტემის, ინტერნეტის ხარისხის მაღალი სტანდარტების დანერგვის თვალაზრისით.

აღსანიშნავია, რომ სინგაპურის სივრცითი და ურბანული განვითარების ტრანსფორმაციის პროცესში ურბანისტებთან და სახელმწიფოს მმართველებთან ერთად აქტიურად იყო ჩართული კერძო სექტორი - დეველოპერები, ინვესტორები, კონსულტანტები, ფონდების მენეჯერები ... სინგაპურმა ურბანული და სივრცითი განვითარების პრობლემები წარმატებით დაძლია და ამაში კატალიზატორის როლი შეასრულა მათ მიერ შემუშავებულმა ქალაქის განვითრების 40-50 წლიანმა გენერალურმა გეგმამ, რომლის გადახედვაც 10 წელიწადში ერთხელ ხდება. აღნიშნულ გეგმას თან ერთვის უძრავი ქონების დეველოპმენტის გაიდლაინები და სამართლებრივი დოკუმენტები, რომელიც მკაცრად არეგულირებს და ზედამხედველობას უწევს ფუნქციონალურ ზონირებას, განაშენიანების სიმაღლეს და ინტენსივობას... ქალაქის ურბანული განვითარების გენერალიური გეგმა ეხმარება დეველოპერებს და ინვესტორებს დაგეგმონ საშუალო და გრძელვადიან პერიოდში მათი პროექტების მშენებლობის სტრატეგიები, ისე რომ შესაბამისობაში მოდიოდეს ქალაქის განვითარების “კონსტიტუციასთან”.

აღნიშნული დოკუმენტის სახით სინგაპურმა შექმნა საუკეთესო მოდელი კერძო და სახელმწიფო სექტორების პროდუქტიული თანამშრომლობის. ბოლო 50 წლის განმავლობაში სინგაპურში მშპ ერთ სულ მოსახლეზე გაიზარდა $1,580 დან $52,960.71 მდე, რამაც ბუნებრივად შექმნა მოთხოვნა ხარისხიან საცხოვრებელ სახლებზე, სამუშაო, კომერციულ და გასართობ სივრცეებზე, გამწვანებულ და მოვლილ რეკრეაციულ ზონებზე, გამართულ სატრანსპორტო კავშირებზე. გადახდისუნარიანობის ზრდამ აწია სექტორში მშენებლობის ხარისხი, როგორც საცხოვრებელ, ასევე კომერციულ უძრავ ქონებაზე. მიწათსარგებლობის და ურბანული განვითარების გრძელვადიანი გეგმა და ამავდროულად, მკვეთრი ეკონომიკური ზრდა იყო მთავარი კატალიზატორი უძრავი ქონების სექტორის სტანდარტების ასამაღლებლად.

სინგაპური დღეს მსოფლიოს ერთ-ერთი ყველაზე წარმატებული ქალაქი- სახელმწიფოა სივრცით-ურბანული და სიცოცხლისუნარიანობის კრიტერიუმით, იგი ლიდერობს მაღალი სტანდარტის ფიზიკური ინფრასტრუქტურის გაშენების და ქალაქის მართვის ციფრული ინფრასტრუქტურის დანერგვის თავლსაზრისით.

სად ვართ ჩვენ?

მიუხედავად იმისა, რომ უძრავი ქონების სექტორი დინამიურად ვითარდება და პასუხისმგებლიანი დეველოპერული კომპანიები ნერგავენ უახლეს სამშენებლო სტანდარტებს და ტექნოლოგიებს ხარისხიანი პროექტების შესაქმნელად, მთავარი გვაკლია - დედაქალაქის თანმიმდევრული ურბანული განვითარება გრძელვადიანი სტრატეგიით.

ქვემოთ ჩამოთვლილ კითხვებზე გვჭირდება გონივრული გადაწყვეტების მოფიქრება, საუკეთესო საერთაშორისო პრაქტიკების გათვალისწინება და მოქმედება:

  • როგორი უნდა იყოს უბნების მიხედვით ახალი მშენებლობების განვითრების სტრატეგია?
  • რა ქმედითი ზომებია საჭირო პოტენციურად არასაიმედო და უსახური სამშენებლო კომპანიების /პროექტების “გასაფილტრად” ?

  • სამშენებლო პროექტების ხარისხს, მდგრადობას, ეკოლოგიურ , სანიტარულ, ნაგებობათა ინსოლაცია თუ ბუნებრივი აერაციის სტანდარტებს და შესაბამისობას ვინ გააკონტროლებს?

  • დაუსრულებელ მშენებლობებს რა ბედი ელის?

  • რა კომპეტენციის, გამოცდილების და ხედვის ადამიანები უნდა  ქმნიდნენ და ამტკიცებდეს პროექტებს,  გასცემდეს ნებართვებს?

  • რა ეშველება ახლად აშენებულ უსახურ შენობებს? როგორ შეიძლება ახალი სიცოცხლე შევძინოთ ამორტიზებულ ძველ შენობებს?

  • როგორ უნდა მოხდეს არქიტექტურული, ისტორიული მემკვიდრეობის შენარჩუნება?

  • როგორი უნდა იყოს ახალი შენობები, რომ ჰარმონიულად ერწყმოდნენ ისტორიულ ლანდშაფტს და თან ძველ შენობებთანაც შესაბამისობაშ იყოს?

  • როგორია დედაქალაქის ყველაზე ოპტიმალური ფუნქციონალური ზონირება, რომ საცხოვრებელი, კომერციული, ბიზნეს, გასართობი, ინდუსტრიული, რეკრეაციული არეალების განვითრება მოხდეს თანმიმდევრულად და გონივრულად?

  • როგორ და როდის შეიძლება, რომ ჩვენც გვქონდეს მოვლილი ე.წ ლონდონური “Hyde Park” ის მაგვარი ან მასზე პატარა, დედაქალაქში გონივრულად გადანაწილებული, მოვლილი და დაცული რეკრეაციული სივრცეები, სადაც ადამიანები მშვიდად, ჯანსაღ გარემოში, ჰარმონიულად გაატარებენ თავის ისედაც მოკლე უქმეებს?

და ბოლოს, როგორ შევქმნათ მომავლის ქალაქი, რომელიც იქნება ჯანსაღი, კომფორტული, უსაფრთხო, არქიტექტურულად დახვეწილი და ხარისხიანი საცხოვრებლად, ბიზნესის საკეთებლად, ინვესტორების და ტურისტების მოსაზიდად?

ყველა ზემოთ ჩამოთვლილ და კიდევ მრავალ კითხვაზე პასუხი შეიძლება იყოს ერთი - ქალაქმა უნდა შეიმუშაოს და დაამტკიცოს მიწათსარგებლობის გენერალური გეგმა, რომელიც ქალაქმშენებლობის, ურბანული განვითარების გრძელვადიან გადაწყვეტებს, ე.წ “კონსტიტუციას” შესთავაზებს მოქალაქეებს, დეველოპერულ ბიზნესს, ინვესტორებს ... შედეგად კი ადამიანების ცხოვრების ხარისხი გაუმჯობესდება, ყველა ასპექტში ...

სიახლე

ფროფერთი მედია

|ყველას ნახვა
დეველოპერული პროექტები
საინვესტიციო ქონება
ფასი:
მინ
მაქს
ფართი:
მინ
მაქს
ფასი:
მინ
მაქს
ფართი:
მინ
მაქს
ID: