დღეს, 12 ოქტომბერს, 13:00 საათზე, ლიკანის ისტორიული კომპლექსის ტერიტორიაზე „რომანოვების სასახლისა და ლიკანის ისტორიული კომპლექსის რეაბილიტაცია-რესტავრაციის პროექტის“ პრეზენტაცია გაიმართება.
პროექტირების ამოცანები: რომანოვების სასახლის რესტავრაცია/მუზეოგრაფია; ორანჟერეის აღდგენა/რეაბილიტაცია; ისტორიული პარკის კეთილმოწყობა/დენდროლოგიის გეგმის შემუშავება; სასტუმრო-საკონფერენციო ბლოკის დაპროექტება; საფეხმავლო ხიდისა და ვიზიტორთა ცენტრის მოწყობა.
პროექტის მიზანია: ლიკანის ისტორიული კომპლექსის ტერიტორიაზე ფართომასშტაბიანი ტურისტული ლოკაციის შექმნა. პირველად თავისი არსებობის ისტორიის მანძილზე, რომანოვების სასახლე და ლიკანის კომპლექსი საქართველოს ტურისტული ინფრასტრუქტურის შემადგენელი ნაწილი გახდება და დამთვალიერებლებს მისი სრული მონახულების, ტერიტორიაზე არსებული შენობა-ნაგებობებითა და პარკით სარგებლობის საშუალება ექნებათ.
